• المدونات خاصة بأصحابها سيتم منع اي شخص من دخول القسم كامل اذا حاول المشاركة في مدونة غيره .
  • سبحان الله وبحمده سبحان الله العظيم




مدونات الاعضاء

يلا نحكي



إنانا

⭐️ عضو مميز ⭐️
يلا نحكي ....

من شوي حضرت فيديو لفنانات هن:
الهام شاهين، هاله صدقي، ليلى علوي
طالعين مشوار سوا بالسيارة ومشغلين
اغاني ومنزلين فيديو متل كل العالم "المهوسه"
بكل مكان.

ع فكرة انا ما بحب التلاته، وع فكرة حبي الهم
من عدمه لا بفيدهم ولا بضرهم بس لابين اني
ما بدافع عنهم كاشخاص لكن بهاجم كل الناس الي
علقت ع الفيديو ب:
- وين رايحين ع دار المسنين؟؟
- العقل زينه .. كبروا واستخفوا
- حطب جهنم
- العجايز المتصابيات
- يا ريت بنحترم عمرنا بس نكبر

نفسي افهم المعلقين الشباب الأكارم ما رح يكبروا؟؟

يا ريت بتوقف ع التعليقات ع الميديا، لا ببيوتنا في
سلوكيات تنمر ع كبار السن بلا حدود!
بنضحك ع افكارهم، اهتماماتهم، لبسهم، طريقة تعبيرهم
عن نفسهم، رغباتهم، وبننسى انهم بيوم كانوا مصدر معرفتنا
واننا بيوم رح نوصل لعمرهم وهو الوقت الي ابدا ما رح نحب
اي شخص ينتقدنا فيه.

احترام الآخر بجميع مستويات اختلافة ثقافة مجتمعية
غائبة، وصدقا محتاجين جنب احترام الآخر التوقف التام
عن اصدار الاحكام وشو بينفع وشو ما بينفع!

كبار السن بمجتمعات ثانية بمارسوا حياتهم بمنتهى الاحترام
لهواياتهم وافكارهم وسلوكياتهم والانماط المعيشية الي بيختاروها
لنفسهم.

وما حد يحكيلي انهم بدور العجزة برا وما حد بينتبه عليهم
بيتهيألي السكن ببيت عجزة مرتب ومحترم اهون من السكن
مع عيلة قررت بالاجماع حجر مجتمعي بكتالوج لشو بيلبق
لكبير السن وشو ما بيلبق
 

إنانا

⭐️ عضو مميز ⭐️
يلا نحكي ...

في معظم الأوقات المذنب الحقيقي
في المصاعب والمشاكل الي بتواجهنا
هو ( إحنا)

مهما بلغ خراب البيئة الي متواجدين فيها
سواء بيئة العمل
الحي الي عايشين فيه وجيرانا
او في بعض الحالات العائلة الي بضمنا
علينا مسؤولية كبيرة بانه نجرب ننجو بانفسنا
ونبني لحالنا حياة جديدة في بيئات أكثر ملائمة النا.

احيانا تغيير البيئة الخربة بكون خيار، الا انه خيار
بده مهارات ووقت وجهد وصبر وهمة قادرة على امتصاص
الخيبات وتوقع الفشل، والاهم انه يكون في بارقة أمل بانه
هل الناس ممكن تتغير.

وعليه،،
يا اما بتهرب لبيئة أفضل
او بتجرب تحسن البيئة الي انت فيها
لكن،،
اياك والتكيف!!
التكيف مع الخطأ بيقتل الروح وبيفتح الباب
للخراب على مصراعيه لحتى ينهش كل طموح
وابتكار وامل موجود عنا.

احيانا التنظير سهل
والتغير او حتى الهروب للبحث عن سيناريوهات
افضل بكون صعب جدا، لكن بدل التكيف لازم
الانسان يدور على ثغرات يدخل منها النور لحياته
ما يستسلم ويخلق حياة مضيئة موازية مهما بلغت
بساطتها، يكون مرن بكل تاكيد ... لكن ما يكون مستسلم.



《 كتبت هذه التدوينة بعد نقاش حاد وغير منطقي
مع مديري في العمل 😏
 

المتواجدين حالياً (عضو: 0, زائر: 1)

أعلى