صهيل القوافي ....

رازي

بـحـر القصيد
[شاعر تغاريد]

ليه يا أُمة،، محمد بعد عزك تخضعين
................................ليه من بين الأمم صرتي فريسه للذئاب

وليه دمك صار يهدر كل وقت وكل حين

................................اصبحت تفرح به الأنياب ويسيل اللعاب

ياحسافه كيـف صرنا أمـة(ن) مستضعفين

.................................بعـد ماكنا سيـوف مسلّطه فـوق الرقـاب

ضـاع منا، ثالث البيتين وآولى،، القبلتين

...............................ضاع يـوم انّا وضعنا روسنا وسط التـراب

في ثرى مهد الرسالات اصبح الأقصى سجين

.....................................آآآه ياكبر الجراح وآآآه ياكبر المصاب

صار له سبعين عام(ن) يستغيث المسلمين

...............................يستغيث ويستغيث ومـا لقى منهم ،جـواب

صار حلم انّا نصلي فـيه حتى، ركعـتين

...............................حلمنا ما اظـن يتحقق سـوى يـوم الحساب

اسألوني؛؛ ليه صرنـا أمـة(ن) متخاذلين

............................أمـة(ن) هـاماتها،، جثـه تجرجرها،، الكـلاب

اسألوني والاجـابه بختصرها بكلمتين

....................................كلمتين ويشهد الله انها عيـن الصواب

ابتعدنا عـن محجة سيـد الخلـق الأميـن

.................................وابتعدنا قبلها عـن محكم آيـات الكتاب

آآآه لو يطلع لنا واحــد من الأمة فطين

.................................يحيي الآمال فينا حتى لـو كانت سراب

يفتح ابواب الجهاد ونطلب احدى الحسنيين

................................امّا نصر(ن) أو شهادة بعـدها حُسن المآب

مانبي واحـد،، يحطمنا وحـن متحطمين

....................................يرتضي فينا المذله والإهانه والعـذاب

لا يقول المجد مات وفي عداد الميتين

...................................ويحلف انه مايعود إلاّ اذا شاب الغراب

دام حنّا احفـاد من كانـو مابين الأخشبين

..................................قادريـن انّا نخلي مجـدنا فـوق السحـاب

ونثبت انّا خـيـر أمة أُخـرجـت للـعـالـمـين

...............................بس ويـن اللي يـوجـهـنا ويـعـطينا الزهاب





 

رازي

بـحـر القصيد
[شاعر تغاريد]

حنا العرب يا المجوس ان كانها بالهياط
ما اظـن ياالفـرس يخـفـاكم هـياط العـرب
بالهـرج نولج قـوافل عـبر سـم الخيـاط
والكحل نستـنبطه من بين رمـش وهـدب
وان كـانها بالطـناخـه في يديـنا سـيـاط
مـا تـضـرب الاّ بنـي عـم(ن).. بلـيّـا سبـب
تبّت أيادي العرب من مسقط الى الرباط
تـجـوز دام انهـا جـازت. على ابـو لـهـب
في سـوريا والعراق تفـوح ريحة شـواط
السّـنه. اجـسادهـم للـنـار صـارت حـطـب
متى تـحـسون يـا أهـل الـذل والانحطـاط
لا صارت اطهر بقاع الارض مسرح شغب
طهران والكلب نصـر اللات وابن البطـاط
هـم رأس فـتـنه تـنامـا شـرّهـا. واقـتـرب
من يزرع الحنظـله بين الكـرز والحمـاط
لا ينـتـظـرها تـجـود.. وتـغـرقـه بالـعـنـب
ياشهـر أيلـول لـو غـطى سـوادك شبـاط
لا زلـت شـامـه قبـيحـه في جبين العـرب
ألـيـس فـيـنا رشـيـد.. يـقـودنـا للـصـراط
ونـعـيـد تـاريـخ مـجـد مـطـرز(ن) بالـذهـب
لـو حُـبـنـا للجهـاد.. يـكـون مثـل الـهـيـاط
كـان الـخـلافـه عَـلمهَـا فـوق هـام السحـب
 

رازي

بـحـر القصيد
[شاعر تغاريد]

الغـرب وصلو مطلع الجدي وسهيل
مــره يجـي مسبـار ويـروح مسبـار
واحـنا العرب باقي على القال والقيل
نغـتاب خلـق الله في جـوف الاسحـار
واكـبـر طـمـوح انّا مـع هجعـة الليـل
نـغـزي وناخـذ مـن بني عمنا الـثـأر
وان ذمّـنا شخـص(ن)نعيد المواويل
ونـذّكـره،، بأفـعـالنا يـــوم ،،ذي قـار
نـقـوم نـتـهافـت على القـتـل بالحـيـل
مـثـل الـفـراش اذا تـهافـت على النار
ثـوراتـنا،، مـا خلـفـت بـعـدهـا سيـل
إلاّ دمـوع ايـتـام، في عـمـر الازهـار
مـااقـول غـيـر الله يـجـازيـه قـابـيـل
وش كلّـفـه يقـتـل،، ويتحمـل اوزار
لا شك هـذي مـن حـكـم رب جبـريل
استغـفـره واتـوب له،، سـر وجهـار
 

رازي

بـحـر القصيد
[شاعر تغاريد]


بــلاد الــشـام لا هنـتي. ولا شجـعـانــك الاحـــرار

ولا هــان الـتـراب اللي رقــد تـحتـه صلاح الديـن


عــروس ابـن الـولـيـد الـقـائــد المتـفـرد المغــوار
ولا مـثـلـه عـريسـك يـابـلاد الـشـام يـخـزي العيـن


بـلاد(ن) بـاركـك رب الـبــريـه والـنبـي المخـتــار
بـلاد المحشر اللي فـيـك يـؤمـن من مشى النجديـن


عـظيمـه فـي عـيــون امــة محـمـد حيـهّـا مـن دار
جـميـلـه فـي عـيـون الغـرب من لنـدن الى برليـن


احبـك واعشقك واكـتب من اجلك اجمـل الاشعـار
غلاتك من غلاة الاندلس وارض(ن) بها النهرين


لك الله يـابـلاد الـشـام مـانـرضـى نشـوف الـعـار
ولا نـرضى الـمـذلـه لـو خضعنا تحـتهـا عقـديـن


عـزانـا ان الأيـادي بـالـقيـود.. مـكـبـله وقـصــار
ويـادوب انها تمسح دمـوع(ن)مـن على الخـديـن


جـراحك من جـراح المسلمين اصغـارهـم وكبار
نـمـوت ولا نـشـوفـك يـامـدايـن سـوريـا تبـكـيـن


طبـيـبـك يـابـلاد الـشام صـارت مـهنـتـه جــزار
رمـى سمّـاعته وادمـن على الساطـور والسكين


عثـا بـأرضـك فـسـاد وكل يــوم يـزوّد المعـيـار
تسّنـد له على ظهر(ن) يسمّى روسيـا والصيـن


منـازل فـوق روس اصحابها تهـدم بـدون انذار
بساتين(ن) كما الفـردوس يسكب فوقها البنزين


شــوارع بـالجـثـث حُبلى دمـاهـا كنها الانـهـار
ضحايـا مجتمـع ينشد عـن الرفعـه في الداريـن


على ذيك الجثث قاموا الشبيحه يرقصون الزار
ومــرة رقـصة الـدبـكـه ومـرة رقـصة التـنيّـن


ســوايـا مــايسويـهـا عسـاكـر.. دولـة الاحـبـار
ولا سـوّى سـوايا البعـث لا هتـلر ولا استاليـن


منـارات المساجـد والمنابر تحـت قصف النـار
صدى صـرخاتها وده يـزلزل سـد ذو القرنيـن


تـوّسد بعضنا ريـش النعـام وبـارك اللي صـار
عسى هالشرذمـه يتـوسـدون الخـزي في سجّين


امـانينا مـعـاهـم فـي وسـط هــودج كـلاه الفــأر
وفوق الهودج اللي مهتري عشعش غراب البين


وعـزتنـا رمـوها فـي بحور(ن) تلـفت الانـظـار
رهـيـنـه في وسـط مـركـب يسمـونـه ابـو دقلين


تجـمّعنا وسـط بـيـت(ن) مبـاديـه البيوت اسرار
يـوصينا على الوحـده وهـو يلعـب على الحبلين


خـسـاه الله مـن بيت(ن) ترعرع في كنف كفـار
يـكيـل العـدل بـيـن اهـله على مـرأى بمكياليـن


إلـهـي يـا مـن ارسلت البـوارح والسماء مدرار
وبلـغّـت النبي مـوسى كليمك مجمـع البحـريـن


ونـزّلـت السكينـه في قلـوب اثنين وسـط الغار
ومنبت فالعراء من فوق يونس شجرة اليقطين


طلبتـك تجـلي الغُـمه عـن اهل الـشام ياغـفّـار
وفــرّج كـربـة المكـروب منهـم يامعـز الديـن


ومـوتـاهـم تـقبلهّـم.. وسـكـنهـم مــع الابــرار
على ذيك الأرائك بين ولدان(ن) وحور العين


ومتعـنا عجـائـب قـدرتـك فـ الطـاغـيـه بشـار
على مـرأى من الأمـة تزلزل تحته الأرضين
 

رازي

بـحـر القصيد
[شاعر تغاريد]

الـوضع مـزري في بـلاد أُمـة الضاد
مـن شـرق بنغازي الى اسوار بغـداد
البـطـش والتهـجـيـر والقـتـل يــزداد
على أيـــادي. مــن شـهـــد بـالنـبّـوه
يـــارب وش هـالبـلــوه اللي بـلـتـنا
ومــن تـحـت جـلباب السكينة خذتـنا
يــا لـيـتـنا قـــدام هـالــيـوم.. مــتـنا
ولا شــهــدنـا ســفــك.. دم الأخـــّوة
مـن بـاع دينه وانتهـك عـرض جاره
مــن شـأن يـصبح في بـلاط الأمـاره
بــكـره. يبيـع اهـله مـقـابـل سجــاره
الله. نـــزع مـنـه الـحيــا.. والـمـرّوه
سبعـيـن فــرقـه خيمَّت بيـن هالـناس
من سلطنة قابوس لين ارض مكناس
تخـلّـي الـخـيّـر يـوسوس ويـنـحـاس
مـا عـاد يـعـرف صـاحبه من عـدوه
سـفيـنـة الأُمـة على امـواج طـوفان
تـلـعب بها الأمـواج مـن غـيـر ربان
يـــارب. بـلـغـَّهـا مــوانئ وشـطــآن
وكل(ن) يتـوب ويصفي الـيوم جـوّه
واسـألك يـا اللي فـوق خلقـك وكيلا
تــــردنـــا. إلـــيـــك رداً.. جــمـيــلا
وتـغـفـر لنا يــارب قـبـل الـرحـيـلا
يـوم الممات وكل عـضـو(ن) مـفـوّه
 

رازي

بـحـر القصيد
[شاعر تغاريد]
يــا الله. يـا مـتــفــرد(ن) فـي صـفـاتــك
ومـن فــوق عــرشك عـز جاهك وذاتـك
اغــدق عليـنا الـيـوم. مــن مـكـرمــاتـك
انـت الكـريـم الـمعطي الـمغـني. الــنـور
مــكــارمــك يــارب تـبـقـى عـظـيـمــه
مـكـارم(ن). مــا مــن وراهــا ظـليـمـه
إلاّ دوى.. لأهــل الــقــلـوب. السـقيـمـه
اللـي تـناجـي فـي وســط لـيـل ديـجــور

يــارب.. فــرجـهّــا عـلـى أُمـــة. اقـــرأ
واكــتـب لـها فـتــح(ن) قــريباً ونصـرا
كـما كــتبـتـه بـأرض قـيـصــر وكــسرا
ماضي فتوحات(ن) تـقل بحـر مسجـور
الـحــال مــا يـخـفـاك يــارب جـبـريــل
مـليــار مسلــم.. والـبـلا مــا هـنا حـيـل
حــيـاتـهـم قـتــل وخـيـانــة.. وتـنكـيــل
واللــوم يـــرمـونـه عـلـى وعــد بلـفـور
تــرى الـبـلا والــوهـن.. مــنـا وفـيـنــا
مـا هــو وعــد بـلـفـور.. ابــن اللـذيـنـا
احــنــا نـهــد.. وعــمــرنـا مــا بـنـينــا
يجــوز نبنـي لا دنــت نـفـخـة الصــور
أُمــة تـخـلـت عــن بـلــوغ الـمـعــارف
واستـبــدلـتهـا بــالـعــري والـمـعــازف
يــوم الأمــم تبني صــروح وتـحــالــف
وتغرس على سطح القمر ورد وزهـور

 

رازي

بـحـر القصيد
[شاعر تغاريد]

يا موطني اليعربي وان طال هذا الصراع
بـكـره شعـوبـك تـجـدهـم كلهـم نـازحيـن

متى جـروحـك تـطيـب وينتهـي الإلتيـاع
وتـعـود واحــة سـلام ودفء للعـالميـن
الخير وافـر بجـوفك واغلب اهلك جيـاع
يامـوطني اليعربي لاشـك ماانت بضنين
انا ادري انك رهينه عند بعض الرعـاع
اللـي مـن اسبابهـم تـنـاحـرو المسلميـن
يـنـفـذون اجــنـدة دولـة بـنُـو قـينُـقـاع
اللي تـدّور لشـق صفـوفـنا مــن سنيـن
ياموطني اليعربي خايف يزيد الضياع
ونـعـود للجهـل ونـداحـم بجـنب ٍ متيـن
نرجع على جهلنا نعبـد يغوث وسواع
ونكايـد السذّج اللي يعبـدون الحسيـن
ضاقت علينا بأراضيك الفجوج الوساع
وجفت مـدامع عيون الركع الساجديـن

كـذاب مـن قـال تحـريرك مجـرد متـاع
وكذاب من يجزم ان النصر بين اصبعين
 

رازي

بـحـر القصيد
[شاعر تغاريد]

بشّـار يـانسل الطواغيت الأنـذال

تبّـت يــدينـك؛؛ ثـم تبّـت يـدينـك
ياحاكم(ن)هميّت في قتل الاطفال
اللي هـم القُــّره؛؛ لعيني وعينـك
ان كان لون الدم يشرح لك البال
لا شـك هـذي تـربـية والـديـنـك
ابوك سوّى قبلك اهوال واهوال
بئس الأبو وانت الولد خابرينك
بـكره تـموت ويسألك رب ميكال
عن كل نفس(ن)ازهقتها يمينـك
عسى جهنم لك مقّـر(ن) ومنـزال
تسكـن بـهـا ويـزيــد فـيها أنـينـك
 

رازي

بـحـر القصيد
[شاعر تغاريد]

مسـاء الخيـر يااجمل عـروسه في بـلاد الـروم
مسـاءك مسـك.. يـادرة مـدائــن أُمــة الــقــرأن

عسى الله بس ماطيّـرت مـن عينك لـذيـذ النـوم
ونقضت الجـروح وسيرة اهل الـذل والخسـران

ليـا مني ذكـرتـك تعتـريني ضيقـة(ن) وهـمـوم
ويـرحل بي حنين الشوق يمك يااجمـل الاوطان

فـديت تـرابك اللي داس فـوقه طـارق الزيـزوم
فديت اسوارك اللي صانها الحاجب من العـدوان

ديــار(ن) فـوقها عـاش ابن حزم وعقده المنظوم
وبـن خـلـدون والـرازي وبـن سيـنا وبـن حـيـان

عسى مـن باع عرضك مطعمه من شجرة الزقوم
ومشروبـه حميم(ن) فـي جهنـم يصهـر الأبــدان

ملـوك اهل الطوائف ضيعو مجدك وبئس القـوم
تخـلو عن شـريعتهم مـن اجـل الـجـاه والسلطـان

وصـارو يدفعـون المـال والجـزيه وجيـه الـشـوم
وهي تفـرض على الكافـر من ايـام النبي العدنـان

وساعتها النـصارى دون عـرضك يفـرقون السوم
شرو عرضك ومجدك ياالعروسه وانتهى اللي كان

تـخـلـو عـنـك وانتي كالــرحيـق العـابـق المخـتـوم
وصرتي كنـز بعيـون النـصارى غالي الأثـمان

سقوطك كان نكسه بس نكسه مـن وراها اعلوم
وطـعنـة فـي قـلـوب أمــة محمـد يـاالله الغـفـران

فـراقــك ياالـعـروسـه مايشـابـه له فـراق الـيـوم
يكـون فراق موسى والخضر في سالف الأزمان

امـانـه ياعــروس الحـاجـب الـمنصور كفي اللوم
تـلـومينـا وحـنـا الـيــوم نـجهـل وازع الإيــمــان

غـديـنـا ننصر الكافـر على المسلم وهـو مظلـوم
ونـرقص فوق جرحه لأجل نرضي أُمة الصلبان

دم المسلـم على المسلـم حـرام ونسفـكـه بـالـدوم
طـبـيعـي نـسـفكـه.. ونـقـدمه للـمعتـدي قــربــان

وبـكـره نهـدم الأقصى عشان الـهيكل المـزعـوم
خلاص ابشرك صرنا مع اهل السبت مثل اخوان

خــرجـنا وابـتـعـدنـا عـن كـتـاب الـواحـد الـقيـوم
تـحّـظـرنـا وصـرنا نستخـف بمـا روى الشيخـان

نـمّـجـد فـي لـمـيس ونـور ومهنـد وبـن مـكـتـوم
وتامر حسني المطرب وحضرة هاتريك روشـان

سألـتيني وش اللي صـار بالـدنيـا وانـا مـصـدوم
ورب الـبـيـت. حـنـا فـي زمـان يشيّـب الـولـدان

دخـيـلك سـامحيني لـوتـجمّـع فـي سمـاك غـيـوم
وربـي مـاقـصدت ارمي عـليك الهـم والاحـزان

انـا واحـد مـن الأمـة حـزيـن وخـاطـره مـكلـوم
بـجـوفـه تـنفـتح بـيـبان حــزن وتـنقـفـل بـيـبـان

عـن اذنك ودي ارحل قبـل تكشفني عيون الروم
ومـوعدنا نهـار الحشر لاجـت من عـدن نيـران

 

المتواجدين حالياً (عضو: 0, زائر: 1)

أعلى