ياهيئة الترفيه ربي يجآزيك ..⚘

بقايا ابيات

[شاعر تغاريد]
-


للحرب قاده ولصياعه صعاليك

وللحب شاعر مايخون بعشيره

يسعد صباح احساس حضرة معاليك

يامعطيه للورد منك عبيررره

قلبي مهيئ لك ويتبع خطاويك

يا ام العيون الفاتنات الخطيرره

نبضات قلبي بكل دقه تناديك

لا يابعد فتنة سعاد ومنيره

اللي يعرفك صدق صعبه يخليك

لو ينعرض له زين شبه الجزيره

لاقلتي "احمد" كل مابي يلبيك

كلي فدا لك ياسمو الاميررره

مكآنك بعيني وجفني يغطيك

مؤبد ابتبقين فيني آسيرره

لو شافك امأسس محلات بوتيك

بيقول زينك مالقينا نظيره

مشروبها موكا وتطلب معه كيك

والكيك بين خدودها المستديره

وياهيئة الترفيه ربي يجازيك

كل يوم بأسبابك حبيبي بديره

تعالي لجدة وربي لمشيك

كورنيشنا فيه المرافي كثيره

اليا مشت خطواتنا ع السراميك

كني وزير وكنك احلى وزيره

مدري وش اللي بكتبه لجل يرضيك

اشغلت شعّار الوطن والعشيره

قالو لي ابن فطيس علمه يقديك

وعجلت ابي رقمه عشان استشيره

رد وبعد ماهو سمع قصتي فيك

سكت !! وصمته طال واجهّر زفيره

قال بهوى مهرتك محد ٍ يضاهيك

وطبع الاصايل يوم تعسف عسيره

ذي نادرة وصف وتحيّر مماليك

تبعد هوى الصقّار عن حب طيره

اذكرك يوم تبيع لجله مساويك

عند المساجد وقت شمس الظهيره

تبغى عيونه تلتفت لك وترويك

وتشب وسط الصدر نارٍ سعيره

خلاص يابن فطيس ربي يخليك

فضحتنا والهرج ماخوذ خيرررره

شاعر وحرفي عن مدى الحب ينبيك

وهالحب مدري وش نهاية مصيررره !؟

وللحرب قاده ولصياعه صعاليك
وللحب شاعر مايخون بعشيره




وسلآمتكم
 

بقايا ابيات

[شاعر تغاريد]

المتواجدين حالياً (عضو: 0, زائر: 1)

أعلى